Cinguzu nyi kholo

El murciélago y el topo

​Cinguzu nyi kholo apwile masepha nyi muthu, ha maximbu anji, apwile nyi kulyendela umwe nyi mukwo ngwe yitanga ya akweze, ahetele ha maximbu a kufupha maphwo, ngwe cize munanyingika yako yetu, mukweze kexi kwita phwo nyi kamutayijile kulyi yisemi jenyi nyi kanyingikine jiko lya mwana phwo, munyaci wenyi hanji yitanga yenyi. Cinguzu kavwile yeswe ayo yamba ngwenyi phwo wayami, yami mwene munguzanga yoze ngunazange usoko kexi nyi cimwe hamwono wami, mungumbata mwazovu wami cici kulweza asoko nyi amwe. Yisemi jenyi yatungumuka, cinguzu hambata, yazanga kuhanjika nenyi mumu kalyingile cipema halyimbunga akwa yako yikulu, ayo yapwile nyi ulemu ha maximbu jenu… ngukonekenu, cinguzu yamba coco.

Aho asoko amuhicikile ukhawenyi nyiwumwe wazangile kumona amuze mukwa phami, cazangile kumumona, watwamine ukhawenyi maximbu anji, kusalyi lyikwo lyacihunda, sepha lyenyi kholo neye kacizangile yamba ngwenyi, neva yeswe, mumu yihako yiye wayihananga mitongo ximbyalyi (7) ya wanda, asako ja kholo ecile, mumu tunanyingika ngwo cinguzu mahasa kupwa nayo, kapwile ngwe mukwo watwama mumavu kanyingikine kuze maciza wanda. Waze alyifa no alyitesele asanyikine cinguzu nyi sepha lyenyi hanga ameneke nyi mukupwa umwe mulonga hanga alyisenyike, tulyisophele yetwene, mumu twavulumuna nyi kupihisa yako yetu, ceswaco cize mutumona ndo yetwene catamba kuyilulyika, yamba sepha lyenyi unanyingika…

Umbaciso wa cingunzu kuwaximbwile cinji, mumu lya fuji ya asoko cize mutukweji alyimbacile, phwo lya cinguzu yafwa cinguzu yapwa tulyiwa amulengulwile kulyi asoko yasala wikha nyi asoko ja phwo lyenyi, yena waxiha phwo lye, ndo umufete… mba cinguzu yalweza sepha lyenyi kholo, yamba ngwenyi: maximbu ano ngulyi nyi milonga, ngukwase kama… Kholo yakumbulula cinapeme, muze yiye atwama kwixi lya mavu yafula wina ndo kucipaulo ca sepha lyenyi haze apwile nyi kusa mutwe phwo lya sepha lyenyi unakafwa, mba kholo yaputuka kwamba nyi kusewula ngwe mufu unahanjika nyi kwamba ngwenyi: - Ngulyi phwo lya Cinguzu kanda nupinjisa lunga lyami mumu asoko jami anguxiha, aye kalyi mwanambala yamba coco mukwa kufwa. Muze asoko jenyi evile coco kalyingile nawa nyi cimwe xina kufunda mufu nyi kuhwisa malyilo, Kholo yambulula sepha lyenyi coco.

Muze kwapaliyika kakweji umuwikha kholo neye yapwa nyi milonga yo yene, phwo lyenyi yafwa, upi waco wakawile waze apwile nyi vundo hasoko jo, upi kuuxi kwahwa, kholo nyi kupihilyila ukhawenyi yasanyika sepha lyenyi cinguzu, muze haheta kumalyilo wato nyi ulyi eh! Eh! Eh! Kholo! Kholo! Mana! Mana! Mana! Kanda ulyila! Nyongenu kanawa mulonga awu kanda nwita nyicimwe, nyicimwe! Kholo! Nyi makwita, yami cinguzu mungwita kamumono muno mitondo ximbyali ya wanda yize Kholo anuhele yihako, mumu yami namuheleyo, yami ngunanuvila kheke kulyi munuyiwana nyi mungunwitayo, yamba ngwo cocene, cocene.

Manyonga jenyi kaalyi apema, tulyi athu a muwikha, yamba nathu ya mukwa kupwa yamba coco, cenaco capwile akwa milami nyi mbenga azangile kusopha milonga nyi kunyonga kha.