Kingungwanjila nyi Sumbu

Kingugwanjila et Sumbu

​O Kingungwanjila ni Sumbu akexile makamba, sekulu ni mwebhu. Kiyadi kya asakanene dikota ni ndenge;

Kingungwanjila wasakana o dikota, Sumbu wasakana o ndenge.

Kizuwa kimoxi o ukowa wafu. Atumikisa o njimbu ya thambi o kiyadi kya o dikota ni ndenge akatuka ni lusolo, kyoso kyabhixila adibakanesa: o dikota wambela ku denge: manu Sumbu phala kulondekesa o dilamba dyetu dya ufwilu wa ukowetu, o tata ya ahatwetu, twotokala tujila o kudya kitudyetu kima mu izuwa yiyi. Kyawabha manu Kingungwanjila, eme we kyene ngabanze, wazwela manu Sumbu. Abha phe kiyadi kya ayi ku thambi ya ukowa, atambwijila ku athu akexilebhu.

Axikama, adikwata mukondo bhu hota dya inzo ku mixima yabanza o ukowakime wafu. O Sumbu wabhange kakithangana watundu bhu kanga watuka bhulu wakwata dihoho dye wadiminya se mukwa kuta kama mu thulu.

O Kingungwanjila waluwala bhu hota dya inzo, webhula kwamukwa: twandabhanga kyebhi? Yuwambe wexi: bhu thambi ya ukowami ki ngidyami kima bhu mbandu; Sumbu watambwijila: eme we ki ngidyami kima maji

Sumbu watuka dingi wayi bhulu mutuluka wakwata dihoho yuwadiminya.

Maji mukubhita izuwa Kingungwanjila wakexile mubhela o mukwetu wale kyambote; wadizwelela mudye: eme ngamubhela, ngamubotomoka maji mukwetu wale hanji kyambote, mwene wamudya. Mu kithangana kyenyoko, ubanzelu wenyu wamwiza mu mutwe yu wakexile kudizwelela: ku thambi ya ukowami ki ngidyami kima o mukwa utambwijila: eme we ki ngidyami kima, maji utuka uya bhulu ukwata dihoho uminya. O izuwa ibhita o Sumbu yusuluka ni kudya mu kaswekele; o Kingungwanjila bhu hota dya inzo yubhela ni nzala kate kyafu.

Mu kiki, O sabhu yiyi itolonga kwila ki tutena kuxikana yoso itudibakanesa ni muthu. Ki tutena kubhana kixikanu kyoso ku muthu umoxi ngo.