Família póbri i galinha inkantadu

Família pobre e galinha encantada

​Tenha un mudjê, el tenha un fidju matxu. Kel fidju txumâ Kustófi. Anton, el ba padjigá, el atxâ un galinha-giné ta kantâ sabi, el ba, el ben:

— Mamá, N ba padjigá, N atxâ un galinha-giné ta kantâ sabi!

El fra:

— Da-m un kuarta midju, N ba pega-l!

El da-l un kuarta midju, el ba, el korê tras di kel galinha, el baza-l tudu txon, el ka xa-l pega-l.

El tornâ ben, el fra:

— Mamá, kel galinha ka xa-m pega-l!

Otu día el torna ba, el baza mas un kuarta midju, el ka pega-l. Na di tres, el pega-l.

Kantu k’el pega-l, el atxa kel galinha ta kanta:

— Sarafinu d’oru, txon di giné, praia dendé, matador di frangu na txada... Si bu pega-m, e bu rikéza... e bu rikéza ki Nhordés dja da-bu!

El ben, el fra:

— O mamá, kel galinha dja ta kantâ sabi!...

Nton, se mai éra póbri. Es éra póbri, es morá nun kazinha. Dipos, kel galinha éra se rikéza. Nton, el drumí na kel funkinhu, el manxê riku: el manxê ku kaza txeu, tudu kuza avontadi. El fra:

— Mamá, mi gó N ten ki ba Praia, pa N ba txumâ nha madrinha ku nha padrin, pa ben odjâ nha galinha kumó ta kantâ sabi!

Kantu k’el ba Praia, el po se galinha dentu vitrina, el dixâ la, pa ningen ka panhâ. Anton, ba parse un amiga di se mai, el fra se mai sin:

— N ben odja kel galinha di Kustófi!

El fra-l:

— Ná, la undi el po-l, el ka po-l pa panhâ... e pa xa la!...

El fra (kel galinha):

— Pa N kantâ mas sábi, e si bu po-m riba pónta di bu méza!

Kel galinha fra-l tres bes, se má fra-l:

— N ta tra-l!...

El tra-l, el po-l riba méza, el kantâ:

— Sarafinu d’oru, txon di giné, praia dendé, matador di frangu na txada... Si bu pega-m, e bu rikéza... e bu rikéza ki Nhordés dja da-bu!

El panha-l... galinha buâ!

Anton, kel tenpu tinha Barlavento ku Sotavento... staba un di dianti, un di tras. El buâ, el da riba Sotaventu, ki stá di dianti tudu, el kantâ, el fra:

— Sarafinu d’oru, txon di giné, praia dendé, matador di frangu na txada... Si bu pega-m, e bu rikéza... e bu rikéza ki Nhordés dja da-bu!

El fra:

— Ooo!... Mamá dja larga-m nha galinha!

Kantu k’el ta ben kaza, el fra-l ma óki el ben, p’el panhâ baxu di solera pórta... p’el panhâ rikéza k’el po-l la. Kantu k’el ben, el txiga, el fra:

— Oooo mamá... dja bu larga-m nha galinha!...

El fra:

— Galinha fra-m p’el kantâ mas sabi, e pa N po-l na pónta méza... agô dj’el buâ!...

Kantu el ba baxu solera pórta p’el panhâ rikéza k’el po-l la, el panhâ dinheru k’el po-l la: baxu kel solera pórta, el grabatâ, el panhâ kel dinheru mé.

Kantu k’el panhâ se dinheru, el fra: – Galinha dja kantá!...

El fra:

— Mamá!...

Galinha riba di kel artu di barku, pa pegâ, el ka ta pega-l. Agô, el fika ku se rikéza. Rikéza dj’el da-l!

Stória kabâ, balá nborkâ!