Mulopwana namuariye
O marido e a esposa
Ari mulopwana aalime itxo sawe, amuariye enona wapeya ehinvahaka, vanonto ahasa makhalelo wi kariki kitxeke itxo saka kere etxu tani? Ole aya wehimeni, akona vehimeni vavale. Amuariye yale yarukula itxo heenhe eyano valussi vavale wi yarapiheke, erapihaka hihale etxooni emoha yamorela mmahi, emorenle mmahini ammoranto wipa mulopwana yole ari vehimeni vavale, ntxipo ipalawe ari:
Mphakura orossiwa
Muara murokiwa,
Mphahura orossiwa
Muara murokiwa,
Ossinve ekathene
Muara murokiwa,
pim pim pim.
Vanonto ammora tho akokela itxelavo tho itxoni heihe, nnlelo tho ipale mulopwana yole:
— Mphakura orossiwa muara murokiwa, mphakura orossiwa muara murokiwa ossinve ekathene muara murokiwa pim pim pim muara murokiwa.
Avenya vavale akelela amanya, akelenle amanya, alotxa wi hinkoni muiiwe etxu enipa valussi, evelevelo, ahitxelavo tho vavale mphakura aphonlawe. Mulopwana yole ammora tho vwili wipa:
Mphakura orossiwa muara murokiwa, mphakura orossiwa muara murokiwa, ossinve ekathene muara murokiwa, pim, pim, pim, muara murokiwa. ̋
Eriki hihale ole akhumavo vehimeni, aya owani, aphinyawe owani, amariye amulela mulopwana ole: yii, nyaka olussi kakelaka orapihawo itxoni yokhala yalotxa vehimeni, olotxa yi ha: Mphkura orosiva muara murokiwa, mphakura orossiva muara murokiwa ossinve ekathene muara murokiwa pim, pim, pim, muara murokiwa. Mulopwana ammora olotxa into haa, tiyewo kineraka kamulima poosswaka muhinakivaha, tivavo kansaka manera kiya vehimeni vavale kinipa nto nntxipo nenne.
Tivo nto atxu othene elapo yele yammora nto ossuwela wi khu, mutxu ereke alima etxu ananvaha nyawe yole analima.
Entaphulela: omulela muthiyana, yereke anyawe yamulima poosso amuapeyeke anvaha anyawe yale eri tenahawa, ohiya yereke yamulima amutxeke mekheiye.